DÍA DAS LETRAS GALEGAS: SACAMOS A LITERATURA AOS CORREDORES

 Coa axuda dos nosos Correspondentes, sacamos aos corredores os carteis que enviou a Consellería de Educación sobre a autora homenaxeada este ano polas Letras galegas: Begoña Caamaño.

   Esta escritora e periodista foi coñecida por reintepretar de forma maxistral os mitos clásicos e artúricos, outorgando un especial protagonismo ás mulleres.

   Coa exposición dos carteis que proporcionan información sobre a súa vida e a súa obra, o noso alumnado poderá desenvolver diferentes acitivades para reivindicar o labor trascendental desta gran autora e defensora da lingua e cultura galegas.

DÍA DAS LETRAS: REIVINDICACIÓN DA OBRA DE BEGOÑA CAAMAÑO

 

Con intención de reivindicar a obra de Begoña Caamaño, a autora das Letras Galegas no ano 2026, a nosa compañeira Raquel, colaboradora no equipo da biblitoteca, reuniu a un grupo de alumnas de 4 de ESO e 1º de Bacharelato para analizar de xeito conxunto a novela da autora de Vigo Morgana en Esmelle. 

Nesta novela, Begoña Caamaño emprega o mito artúrico para apuxar aos seus lectores a reflexionar sobre a culpa, a sororidade e o peso do patriarcado na vida das mulleres. O argumento parece simple: Morgana chega a Esmelle na procura de respostas sobre a súa inmensa infelicidade. A través das súas lembranzas, conseguimos tecer as verdadeiras causas da caída de Camelot. 

Os participantes na xuntanza destacaron que, a pesar desa aparente simplicidade, a novela resultaba un tanto complicada debido ao seu léxico variado e riquísimo e, sobre todo, á mestura de voces narrativas, que aportan múltiples perspectivas, pero que por momentos dificultan a comprensión do texto.

No relativo ao tema, coa sabia axuda de Raquel, o alumnado puido reflexionar sobre diferentes cuestións: Como inflúe o patriarcado na existencia das mulleres? Resulta lícito esquecer as consecuencias dos nosos actos? Pode a culpa acompañarnos toda a vida? 

Foi moi interesante escoitar as conclusións dos nosos alumnos sobre a deconstrución do mito artúrico e sobre a nova visión que aporta Begoña Caamaño ao dar voz aos vencidos e esquecidos.

En resumo, unha actividade moi ben aproveitada!!! 

DÍA DE ROSALÍA: RECITADO NO BARRIO

 

Para celebrar o Día de Rosalía, o noso alumnado de Correspondentes Xuvenís converteuse en dinamizador cultural e percorreu o barrio animando aos veciños a recitar poemas da autora galega.

Con esta actividade, os nosos animosos rapaces pretenderon potenciar a participación cidadá na homenaxe á nosa autora máis universal e, sobre todo, achegar ao público xeral a obra rosaliana tratando de fomentar ao mesmo tempo o pracer pola lectura.

  A pesar de que foi unha actividade moi ben organizada e cunha selección fantástica de poemas de diferente extension e dificultade, non resultou doado conseguir a colaboración de todos os que foron invitados a unirse á nosa celebración. 

  Non obstante, atopamos a varios lectores entusiastas que nos acompañaron amablemente na actividade, que nos animaron a continuar e que recibiron, por suposto, unha rosa como agasallo pola súa xentileza e cordialidade. 

DÍA DE ROSALÍA: RECITADO NO CENTRO (ALUMNADO)

 

 Con intención de celebrar o día de Rosalía, os nosos Correspondentes Xuvenís reuníronse na Biblioteca do insituto para recitar poemas da autora de Padrón e lembrar así con admiración, respecto e agarimo a figura da grande poeta galega.

Foi unha actividade moi animada e divertida que espertou a vea poética dun alumnado entusiasmado que soubo honrar coas súas lecturas emocionadas a memoria da autora de Padrón.

8M: FALADOIRO SOBRE A SITUACIÓN DA MULLER NO MUNDO

 Con motivo da celebración do 8M, as nosas compañeiras Carme e Raquel coordinaron ao alumnado de Correspontentes Xuvenís na organización dun faladoiro para reflexionar sobre a situación da muller no mundo.

Comezamos a reunión cunha pregunta moi concreta? Como é realmente a situación da muller na nosa sociedade? Que ocorre noutros lugares?

O alumnado participante na actividade considerou maioritaramente que na nosa sociedade a situación da muller mellorou enormemente con respecto ao que ocorría en épocas pasadas. Moitos se apoiaron en coñecementos adquiridos na materia de Historia, en lecturas ou en comentarios de nais, tías ou avoas para abordar cuestións como o acceso ao mercado laboral ou á posibilidade de actuar con autonomía e liberdade á hora de mercar un electrodoméstico, abrir unha conta de aforro ou viaxar. 

Os alumnos e as alumnas non foron tan optimistas con respecto ás mulleres noutras culturas e/ou outras sociedades e denunciaron as limitacións no acceso á educación, os códigos de vestimenta restritivos, as leis desiguais en materia de violencia de xénero ou os matrimonios infantís.

No relativo á necesidade de seguir desenvolvendo accións destinadas a dar visibilidade ás desiguadades que aínda existen (incluso na nosa sociedade), as opinións foron variadas. Unha parte dos participantes considerou que este tipo de medidas é imprescindible para continuar avanzando na igualdade, pero outra parte defendeu a idea de que moitas destas iniciativas son inútiles e mesmo contraproducentes, porque as voces que se alzan para denunciar os supostos "privilexios" da muller son cada vez máis fortes e belixerantes.

Para finalizar, debatemos sobre se na actualidade empeza a detectarse un retroceso na igualdade entre rapaces rapazas en diferentes ámbitos (volta aos roles de xénero tradicionais, escolla de estudos ou aumento do control dos mozos cara ás mozas...). Os participantes no coloquio aseguraron que non aprecian ese tipo de situacións no seu devenir habitual.

Reealmente foi unha actividade intensa e cunhas reflexións moi ben argumentadas!!!  

8M: MULLERES NO CAMPUS DE FERROL

 

Para rematar coas celebracións relacionadas co 8M, dende a Biblioteca solicitamos a exposición "Mulleres investigadoras do Campus Industrial de Ferrol" coa intención de dar a coñecer ao noso alumnado o labor docente e investigador de varias figuras femininas no Campus da nosa cidade e, sobre todo, de espertar vocacións científicas e tecnolóxicas entre as nosas alumnas.

Coa intención de apoiarnos na nosa inquedanza, visitounos Lucía Santiago.

Esta novísima profesora e investigadora comezou a súa participacion falándonos da súa experiencia formativa e laboral como oceanógrafa. Insistiu no moito que lle gusta o seu traballo e nas interesantísimas saídas laborais que ofrece a súa especialidade. 

A continuación, presentounos brevemente o labor das súas compañeiras na universidade, facendo especial fincapé nos aspectos atractivos do seu labor: alta empleabilidade, relación coa innovación tecnolóxica, posibilidade de adicarse á investigación...

Realmente foi unha xornada interesante e ben aproveitada.      

8M: CHAPAS SOBRE AVENTUREIRAS FEMININAS

 

Durante o presente curso académico, o tema proposto pola nosa Biblioteca como punto de partida para promover e desenvolver actividades de lectura e investigación foi "Aventura e aventureiros/as". 

Apoiándonos nese tema, o noso alumnado de Voluntariado desenvolveu a biografía de mulleres aventureiras de diferentes épocas. Realmente non foi fácil escoller, porque o número de féminas que se alzaron contra os prexuízos da súa época e decidiron actura de forma libre segundo os seus propios principios vitais é moi ampla, pero finalmente foron seis as mulleres seleccionadas:

-Jeanne Barett, a primeira muller en dar a volta ao mundo en barco, pero vestida de home.

-Alexandra David Néel, a primeira muller en acceder á capital do Tibet, que tivo que entrar camufllada con roupas masculinas.

-Annie Londonderry, a primeira muller en dar a volta ao mundo en bicicleta vestida con pantanlóns e nun vehículo masculino.

-Delia Akeley, a primeira muller en percorrer soa e a pé o continente africano ignorando os perigos que a ameazaban no seu camiño.

-Mary Kingsley, que visitou tribos de caníbales para investigar os seus costumes e comportamentos.

-Alexandra Tinne, a primeira muller que cruzou  o deserto do Sahara.

Coa imaxe destas mulleres e coa axuda das nosas compañeiras Rocío, Elisa e Julia, membros do equipo da Biblioteca, os rapaces participantes na actividade crearon chapas para distribuír entre os membros da nosa comunidade educativa.

Realmente foi unha actividade ardua, porque resulta preciso aprender o proceso e aplicalo con precisión para que o resultado sexa correcto.

Pero todos e todas se aplicaron e remataron desenvolvendo un traballo moi aceptable

E moi ben recibido polos seus compañeiros e compañeiras!!!

DÍA DE ROSALÍA: RECITADO NO CENTRO (PROFESORADO)

Para acompañar o recitado do alumnado con motivo do Día de Rosalía, os nosos Correspondentes Xuvenís animaron ao profesorado do noso IES a contribuír coa lectura dramatizada de diferentes poemas da gran poeta galega.

    Foron moitos os docentes que nos acompañaron nesta actividade que non só supuxo un recordo emocionado da obra rosaliana senón tamén un apoio decisivo e maioritario á nosa lingua.

 

EXPOSICIÓNS NA BIBLIO: AS LAVANDEIRAS

 

 Como en anos precedentes, tamén durante o presente curso académico na nosa biblioteca expoñeremos diferentes actividades que son ou foron relevantes para a nosa comunidade educativa.

Un dos traballos de investigación mellor valorados durante o curso pasado foi o que desenvolveu o noso alumnado de PDC sobre o tradicional oficio das lavandeiras e o seu papel na economía familiar. Coordinados por Natalia Ogorodnikova, a súa profesora do Ámbito Lingüístico e membro do noso equipo de Biblioteca, os alumnos e alumnas encargáronse de buscar información sobre este oficio tan duro para descubrir cal era o proceso de lavado (recollida de roupa, transporte, proceso de lavado e devolución aos donos), as condicións de traballo das mulleres (porque eran maioritariamente mulleres) e os problemas de saúde que padecían (falta de seguridade laboral, gran esforzo físico, lesión nas mans e nas costas, doenzas pulmonares...) ou a sororidade (nos lavadoiros, as traballadoras compartían confidencias e trataban de axudarse e apoiarse).

Como culminación do seu labor investigador, o noso alumnado, guiado por membros da Agrupación das lavandeires de Sillobre,  desenvolveu o roteiro das lavandeiras de Sillobre.

Unha mostra do seu traballo e esforzo pode ser contemplado na nosa Biblioteca.